Аввал маълум қилинганидек, тегишли хусусийлаштириш дастурларига мувофиқ, “Invest Group Centre” МЧЖ (кейинги ўринларда - Актив) устав капиталидаги 100 фоиз давлат улушини сотиш бўйича бошланган очиқ савдо жараёнларининг Мажбуриятга эга бўлган таклифлар (BO)ни тақдим этиш босқичида 3 нафар талабгор иштирок этиш учун таклиф қилинган.

Ушбу босқичда, Талабгорларга хусусийлаштириш бўйича консультант "Portfolio Investment" томонидан тайёрланган Активнинг молиявий, солиқ, ҳуқуқий ва экологик фаолияти юзасидан комплекс таҳлилий маълумотлар билан танишиш ва Активнинг бошқарув органи билан учрашиш имконияти яратилди.

Белгиланган муддатларда 3 нафар талабгор томонидан Мажбуриятга эга бўлган таклифлар (BO) тақдим қилинган ва активни сотиб олиш учун энг юқори нарх таклифини билдирган “Капиталбанк” АЖ 297,9 млрд сўм сотиб олиш тўловини 1 (бир) ой ичида тўлиқ тўлаш шарти билан савдо ғолиби деб топилди.

Бунда, Активни сотиб олишга ва унинг кейинги фаолиятига қўйилган қуйидаги шартлар Харидор томонидан қабул қилинган:

• Актив ва унинг балансидаги спорт-соғломлаштириш мажмуасининг фаолият турини 10 (ўн) йил муддат сақлаб қолиш;
• Актив балансидаги спорт-соғломлаштириш мажмуаси ҳудудида спорт-соғломлаштириш фаолиятига тўғри келмайдиган бино-иншоотларнинг қурилишига йўл қўймаслик (таъмирлаш ишларидан ташқари), объект ҳудудида ҳар қандай таъмирлаш-тиклаш ишларини қатъиян архитектура-шаҳарсозлик кенгашининг рухсати билан амалга ошириш.

Харидорнинг таклифи Консультант томонидан ҳисобланган Активнинг индикатив нархлар оралиғининг юқори қисмида жойлашган ҳамда баҳоланган қийматидан юқори.

Активни хусусийлаштириш натижалари Давлат активларини хусусийлаштириш ва хусусийлаштириш жараёнларини мувофиқлаштириш давлат комиссиясининг тегишли қарори билан маъқулланган.