Тегишли хусусийлаштириш дастурига асосан “ЎзБАТ А.О.” ҚК АЖ (кейинги ўринларда – ЎзБАТ) устав капиталидаги 2,6 фоиз давлат акциялар пакети хусусийлаштирилиши белгиланган.
“Акциядорлик жамиятлари ва акциядорларнинг ҳуқуқларини ҳимоя қилиш тўғрисида”ги Ўзбекистон Республикаси Қонунининг 6-моддасига асосан акциядорларнинг сони эллик нафардан ошмаса, жамият уставида назарда тутилган бўлса, ўз акцияларини сотаётган акциядор акцияларини сотиш нияти тўғрисида бошқа акциядорларни акцияларнинг нархини ва учинчи шахсга таклиф этиш шартларини кўрсатган ҳолда тўғридан-тўғри ёхуд жамият орқали ёзма шаклда хабардор қилиши шартлиги қайд этилган.
ЎзБАТ Уставида акциядорларнинг акцияларни сотиб олишда имтиёзли олиш ҳуқуқи қисмида ЎзБАТ акциядорлари ўзларига тегишли бўлган акциялар сонига мутаносиб равишда, бошқа акциядорлар томонидан учинчи шахсга таклиф этилган нарх ва шартларда сотилаётган акцияларни сотиб олишда имтиёзли олиш ҳуқуққа эга эканлиги ҳамда бошқа акциядорлар ўзининг устувор ҳуқуқидан фойдаланмаган тақдирда, ЎзБАТ акциядорлар томонидан сотилаётган акцияларни сотиб олишда имтиёзли олиш ҳуқуққа эга бўлиши белгиланган.
ЎзБАТ устав капиталидаги 2,6 фоиз давлат акциялар пакети мустақил баҳоловчи ташкилот жалб қилинган ҳолда баҳоланган ва баҳолаш ҳисоботининг ҳаққонийлиги экспертизадан ўтказилган.
Давлат активларини бошқариш агентлиги томонидан ЎзБАТ акциядорлари ҳамда ЎзБАТ юқоридаги акциялар пакетини баҳоланган қийматда имтиёзли ҳуқуқда сотиб олиши мумкинлиги тўғрисида ёзма шаклда хабардор қилинган.
Ўз навбатида, ЎзБАТнинг хорижий акциядори BAT Uzbekistan (Investment) Limited компанияси (Буюк Британия) томонидан имтиёзли ҳуқуқдан фойдаланган ҳолда ЎзБАТ устав капиталидаги 2,6 фоиз давлат акциялар пакетини баҳоланган қийматда сотиб олиш истагини билдирилган.
Шунга кўра, Давлат активларини бошқариш агентлиги ва BAT Uzbekistan (Investment) Limited компанияси ўртасида 2025 йил 29 сентябрда ЎзБАТ устав капиталидаги 2,6 фоиз давлат акциялар пакети BAT Uzbekistan (Investment) Limited компаниясига баҳоланган қийматда, 269,7 млрд сўмга сотиш юзасидан олди-сотди шартномаси имзоланган.
Ўз навбатида, мазкур шартномага мувофиқ жорий йил сентябрь ойида Давлат активларини бошқариш агентлигининг хусусийлаштириш жамғармасига келиб тушган ушбу маблағлар қонунчиликда белгиланган тартибда республика бюджетига ўтказилган.
